Nag-puli nin kabilugan na walong bulawan na medalya asin sarong pirak matapos an saindang puspusang pagrepresentar sa Pilipinas sa ginibong 15th International Dragon Boat Federation Club Crew World Championships sa Taiwan an PADS Adaptive Dragon Boat Racing Team.
Sa nasabing kompetisyon na ginibo poon Agosto 29 sagkod Setyembre 7, 2026, bako sanang medalya an nakua kan koponan kundi nakapagrehistro man sinda nin tolong bagong world records sa manlaen-laen na kategorya.
Sa sarong eksklusibong intrevista kan Star FM Cebu ki JP Maunes, an team manager kan PADS Dragon Boat Team, ipigheras kaini na sarong dakulang onra para sa bilog na koponan an liwat na maitaas an bandera kan Pilipinas sa pangkinaban na entablado.
Segun ki Maunes, labi pa sa mga medalyang saindang nakua an kahalagahan kan kapangganahan na ini huli ta an saindang katuyuhan iyo na magsirbing inspirasyon sa mas kadakol pang atletang may kakundian na nangangarap man na makipagkompetensya sa international stage.
Ipigheras man kan team manager na bunga kan pirang bulan na grabeng pagpraktis, sakripisyo, disiplina, asin daing-untok na suporta hale sa saindang mga pamilya, coaches, partners, asin supporters an saindang naging kahanga-hangang performance sa Taiwan.
Inako kaini na dai naging pasil an lambang laban na saindang inatubang sa kompetisyon, alagad pinagpagalan asin ginana ini kan bilog na koponan sa paagi kan pagkakasararo asin dedikasyon.
Para sa Cebu-based na dragon boat racing team, an saindang kapangganahan sarong malinaw na patunay na kun tatawan nin tamang oportunidad asin supisyenteng suporta, kayang-kaya kan mga atletang Pilipinong may kakundian na makipagsabayan sa pinakadakulang kompetisyon sa bilog na kinaban.
