Pig-omaw ni Speaker Ferdinand Martin Romualdez an pag-iba kan mga Overseas Filipino Workers (OFWs) sa Expanded Pambansang Pabahay para sa Pilipino (4PH) Program kan administrasyong Marcos, na soboot sarong patunay kan kamawotan ni Presidente Ferdinand Marcos Jr., na mapamarhay an buhay kan mga pigkokonsiderar na makabagong bayani kan nasyon.
Ginibo ni Speaker Romualdez an pahayag makalihis na ianunsyar kan Department of Human Settlements and Urban Development (DHSUD) na kaibahan na an mga OFW sa socialized housing program sa irarom kan pinahewas na 4PH, anuman an saindang buwanang kita.
Sigun ki DHSUD Secretary Jose Ramon Aliling an pagkakabali kan mga OFW sa programa an kasimbagan sa direktiba ni Presidente Ferdinand Marcos Jr na pahewason an sakop kan primerong housing initiative kan gobyerno tanganing mas kadakol na mga Pilipino an makinabang orog na an mga nagtitios magtrabaho sa ibang nasyon tanganing maitaguyod an saindang mga kaparientes.
Sigun sa Pag-IBIG Fund Circular No. 473, kwalipikadong mag-apply para sa pabahay sa irarom kan 4PH na mga OFW basta sinda an aktibong miyembros kan Pag-IBIG, first-time homebuyer, asin dae malabi sa 65-anyos sa oras kan aplikasyon.
Kaipuhan masierto man na sinda an insurable hasta sa matapos an termino kan loan, na dae dapat maglampas sa edad na 70.
Sinaysay ni Speaker Romualdez na an pag-iba kan OFWs sa 4PH an sarong dakulang lakdang tanganing gibuhong mas inklusibo asin abot-kaya an mga socialized housing program sa nasyon, orog na para sa mga pamilyang nasa hababa asin tahaw na lebel an kita.
Pig-enkaminar man kaini an DHSUD na padagos na pahewason asin pamarhayon an sakop asin benepisyo kan 4PH tanganing masimbagan an housing backlog sa nasyon, na pigkakarkulong malangkaw gikan sa 6.5 milyon ngunyan hasta 22 milyon pag-abot nin 2040.
Pigsierto man kan lehislador ki Presidente Marcos an bilog na suport kan pamayuhan kan Kamara para sa pagkriar nin ley asin badyet na mapahewas sa oportunidad kan homeownership para sa mas kadakol na mga Pilipino.
