NAGA CITY – Pig-esplikar kan sarong prosecuter an mga proseso para sa pag-impeach kan sarong halangkaw na opisyal kan gobierno.
Sa entrevista kan Bombo Radyo Naga ki Prosecutor Freddie Nojara, Criminal Law Professor and Lecturer, Deputy City Prosecutor, gikan Antipolo City, sinaysay kaini na basado sa 1987 constution, nakapalaog digdi an procedure kan impeachment sa sarong opisyal siring kan Presidente, Bise Presidente, miyembro kan Supreme Court, miyembro kan constitutional commission asin Ombudsman.
An impeachment an nagpupuon sa sarong verified complaint na ipa-file kan isay man na miyembro kan House of Representative o isayman na Filipino Citizens.
Enkaso na endorse na an reklamo, dapat man ining i-reffer sa komitiba kan House of Representative o an Blue Ribbon Community.
Sa laog kan sampulong aldaw, madesisyon an mga ini kun dadarahon sa plenaryo an reklamo o dae asin aaramon man kan mga komitiba kun bastante o kabali ini para sa grounds for impeachment sa konstitusyon siring kan culpable violation of the Constitution, treason o pagtatraydor sa gobierno, bribery, other high crimes, graft and corruption.
Kaipohan man nin 1/3 na boto kan gabos na miyembro kan House of Representative antes ini magibo nin article of impeachment.
Sa oras man ini, dadarahon na ini sa Senado para sa pagdangog asin an senado man an madesisyon kun pahahalion sa pwesto an bise presidente.
Mientrastanto, sinaysay man ni Nojara na basado sa mga binutasan na tataramon ni VP Sara, matibay ining ebidensya para sa grave threat orog na ta bakong edited an video kaini.
