NAGA CITY- Padagos na pigtututukan kan lokal na gobierno kan siyudad nin Naga an pagpapakarhay asin pag-improve kan mga drainage system sa siyudad.
Sa entrevista kan Bombo Radyo Naga ki Raynor Rodriguez- Head kan CDRRM, sinaysay kaini na igwang pondo na nagkakatendad nin P50-M an pigtagama sa paagi kan Local Disaster Risk Reduction and Management Office na makakatabang sa pagbawas kan marekas na pagbaha sa mga lugar na naglangkaw an tendency makalihis an Bagyong Kristine.
Sigun pa ki Rodriguez, susog sa pag-aadal na pigkundusir, napag-araman na pigtahuban an mga sadit na waterways kan mga residente asin establishments na nakakapag kontrebwer sa problema sa pagbaha.
Apwera digde, padagos man an pakikipag-ulay kan nasambitan ng opisina sa tabang kan mga barangay kapitan sa mga residente sa siyudad na harani o naka istar sa mga salog.
Nagkaigwa soboot nin public consultation dapit digde tanganing maipaliwanag kun tano kaipuhan sinda na halion duman asin irelocate sa mas salbadong lugar. Obheto kaini na malinigan an mga waterways asin magin salbado an mga residente harani sa area.
Sa ngunyan, pigsierto na sana kan opisyal na padagos an saindang ginigibong mga lakdang tanganing masimbagan an problema kan Naga pag-abot sa labing pagbabaha tuyong may kalamidad o pag-uuran.
