NAGA CITY – Pangapodan ngunyan sa Lagonoy, Camarines Sur an pagmantinir kan presyo kan Agri-products huli sa hababang presyo kan barakalan kan mga negosyante.
Sa entrevista kan Bombo Radyo Naga ki Demetrio Ramos, Agricultural Technologist-Corn Coordinator, sinaysay kaini na kaipohan tutukan bako sana kan Local Government Unit (LGU) alagad magin an National Goverment an mantiniron an presyo kan produktong pang-agrikultura tanganing mainspirar pa an mga paraoma na magtanom. Ini orog na ta nag-aagrangay na an mga hog raiser huli sa huma kan African Swine Fever (ASF) huli sa hababang presyo kan orig.
Katakod kaini, an saindang lado katuwang an LGU-Lagonoy nagkakampanya sa tamang presyohan kan orig orog na ta nag-agi pa sana an panlalamasa kan bagyong Enteng sa nasyon.
Mientrastanto, sa sainda man soboot na banwaan an mayong nairehistrong kaso kan siring na helang. Ini nin huli ta mahigot na nag-iikot an saindang pag-iriba sa pagmonitor kan mga sitwasyon sa origan sa banwaan. Siringman an saindang padagos na pagbabandilyo asin pangangampanya kontra sa nasambitan ng helang.
Sa presente, nasa P120 kada kilo kan orig sa saindang banwaan kun saen laog paman ini sa record kan Regional Office. Alagad sa ibang banwaan soboot an nagpapakol na sana sa P110.
Sa ngunyan, pangapodan na sana ni Ramos an padagos na pagtatanom asin pag-aataman nin mga hayop siring kan orig sa ibong kan mga naeeksperyensiyahan na kalamidad para sa sustainable agriculture.
