NAGA CITY- Nagin generally peaceful an pag-obserbar kan Semanta Santa sa banwaan kan Calabanga, Camarines Sur, an saro sa mga lugar sa probinsiya kan Camarines Sur na pigdayo kan haros nasa milyong deboto na gikan pa sa manlaen-laen na lugar.
Sigun ki Geraldine Dollero, may-sadiri kan Amang Hinulid sa Calabanga, Camarines Sur, pigsaysay kaini na ngunyan na taong 2024, nagdagsa an ribo-ribong mga deboto sa pigsagibong prusisyon kan nakalihis na Biyernes Santo sa saindang banwaan partikular sa barangay Sta. Salud kun saan makukua an 200 taon ng pigdarayong Imahe kan Amang Hinulid.
Katakod kaini, nagin mahigot man an nagin pagbabantay kan mga kapulisan katabang an BFP, barangay tanod asin iba pang katabang na ahensiya sa kada inagihan kan prusiyon tanganing masierto an kasalbaduhan kan gabos.
An mga motorist assistance center/ desk kan mga kapulisan an nagtitinir na nakapwesto pa man giraray hasta ngunyan na aldaw asin mahigot pa man giraray an saindang pagbabantay sa mga nag-araging behikulo. Mientrastanto, mayo man nairehistrong kariribukan sa kasagsagan kan prusisyon asin naki-kooperar man an kada deboto sa piglatag na mga panundunan kan simbahan asin lokal na gobierno kan Calabanga.
Sa ibong na lado, nakapagrehistro man nin nagkapirang aksidente sa tinampo sa kasagsagan kan pag-obserba sa Holy Week na kun saen an mga imbwelto an haros motorsiklo asin iba pang klase kan behikulo, siring na sana sa nangyaring banggan kan sarong motorsiklo asin delivery truck sa Zone 1 San Felipe, Naga City.
Sa ngunyan, ipinagpasalamat man ni Dollero na ngunyan na taong 2024 nagin matrayumpo an pag-obserba sa Mahal na Araw asin saindang nahiling an pusog na debosyon kan kadakol na tawo sa Imahe ni Amang Hinulid sa banwaan kan Calabanga, Camarines Sur.
