NAGA CITY- Nagiging dipisil an pag-rescue sa mga soldados na nairido sa nangyaring bakbakan laban sa mga rebeldeng New People’s Army (NPA) sa parte kan Labo, Camarines Norte.
Sa entrevista kan Bombo Radyo Naga ki Col. Boots Regencia, Deputy Commander kan 902nd Infantry Brigade, sinaysay kaini na nakaabot na sa saindang kampo an helicopter na gagamiton kan mga militar para ma-rescue an soldados na nairido sa nasambitang bakbakan.
Huli man sa namamateang pag-uuran asin kikilat sa probinsya nin Camarines Norte, nadidipisilan suboot an tropa kan gobyerno tanganing marescue tulos an apat na soldados na nairido sa pangyayari.
Sigon ki Regencia, nagpapadagos pa nanggad hasta sa ngonyan an pigkokondusir na pursuit operations sa pangengenot kan mismong commander kan 9th Infantry Battalion na si Lt. Col. Leo Bongosia tanganing lapagon an nagdurulag na mga rebelde.
Marurumduman na sarong soldados an nairehistrong binawian nin buhay mantang apat man an nairido sa nangyaring engkwentro sa pag-ultanan kan militar asin rebeldeng NPA sa nasambitang probinsya.
