NAGA CITY – Pig-urgulyo kan sarong konsehal sa syudad nin Naga na padagos-dagos nang nabibisto an syudad sa manlaen-laen na lugar na makakatabang tanganing mapauswag an ekonomiya.
Sa nagin paghampang sa mga kagawad kan media ni City Councilor Joe Perez, sinaysay kaini na marhay na bareta huli ta nagigin aware na an mga turista kun yaon sain an Naga asin ano an yaon digdi.
Kasabay kaya kan pag-angat nin tourist arrivals an pag-uswag man kan mga negosyo sa syudad.
Dugang pa ni Perez, dakulang adbentahe sa syudad an pagkakaigwa kaini nin Penafrancia Festival huli ta nagdadara ini nin nasa 1.5 hasta 2-M na mga bisita na nagtitinir sa syudad nin haros sarong o duwang semana na dakulang tabang para sa mga negosyo asin turismo.
Sa ibong kaini, pigtatarget man kan LGU na magkaigwa nin mga programa na makaka enganyar sa mga turista na magpasiring sa Naga dawa bakung Setyembre o bakung selebrasyon kan Penafrancia Festival.
Saro pa sa indikasyon kan pag-uswag an pagpapatugdok nin mga shopping center sa syudad, huli ta boot sana kaining sabihon igwa sinda nin nahihiling na market.
Nakakatabang man soboot an mga programa na piglalapigotan kan lokal na gobierno tanganing mas mapakarhay pa an kamugtakan kan syudad nin Naga.
Nagpaabot man nin labing kaogmahan si Perez huli sa pagigin numero uno kan syudad sa Bicol Region asin ika-7 sa bilog na nasyon komo Most Popular Tourist Destinations in 2023.
Katakod kaini, padagos an paglapigot nin Naga tanganing mas orog na mapakarhay an lado kan transportasyon pasiring asin paluwas kan syudad na makakatabang tanganing mas kadakol an maenganyar na magbisita digdi
