Nangapudan an National Food Authority (NFA) sa mga mangangalakal asin man negosyante na dae baraton o an mga paraoma sa pagbakal nin paroy o unmilled rice sa hababang presyo.
Sinaysay ni NFA administrator Larry Lacson na may na-monitor an NFA na mga lugar kun saen an mga mangangalakal ay nagbabakal nin paroy gikan sa mga paraoma sa kantidad na P11.50 per kilo, may 32 iba pang lugar kun saen an buying prices ay P13 hasta sa P15 per kilo.
Basado sa NFA’s Palay Procurement Activity na may petsang April 18, 2024, nagbakal an ahensya nin malinig asin man alang na paroy sa presyong P23 hasta P30 kada kilo, mantang an sariwa asin man basang paroy ay P17 hasta P23 kada kilo.
An pigtutukdong dahilan ni Lacson sa hababang ‘buying price’ nin paroy sa traders iyo an mga paraoma na nagtutugot na binabarat an saindang presyo asin man an pang kinaban na pagbaba sa presyo nin bagas.
Sa ibong na lado, nagbakal soboot an NFA nin 4.6 milyong sako nin bagas, mas halangkaw kumparar sa 3.6 milyong target kan ahensya, plano pa kan ahensya na magbakal pa nin mas kadakol.
Tangani masimbagan an hababang presyo nin paroy, sinaysay ni Lacson na binuksan na kan NFA an mga bodega kun saen an mga bagong bakal na paroy gikan sa mga paraoma ay nakaimbak.
Paririkason man kaini an pagtugdok asin pag-pakarhay kan 134 mga bodega sa manlaen-laeng panig kan nasyon tangani ilangkaw an pag-iimbak sa 800,000 metric tons (MT) sa 2028.
Mientrastanto, nagbakal man an ahensya nin 14 trucks na ide-deploy sa mga lugar na may hababang buying prices nin paroy, asin man magkua nin stocks gikan sa mga paraoma na dadarahon sa mga bodega na may kapasidad.
Plano man kaini na magbakal nin 90 trucks ngunyan na taon, asin may kabilogang 600 trucks sa 2028.
