Maikokonsiderar na sarong marahay na bareta asin positibong pag-uswag para sa nasyon an pagbaba kan numero kan mga daing trabaho.
Ini an sinabi ni Speaker Ferdinand Martin G. Romualdez katakod kan Labor Survey kan Philippine Statistics Authority (PSA) na nagpahiling na buminagsak sa 3.2 porsyento an bilang kan mga Pinoy na daing trabaho kan Nobyembre kan nakaaging taon puon sa 3.9 porsyento kan Oktubre 2024 o katampad kan 1.66 milyon na mga tawo.
Nagbaba man An underemployment rate sa 10.8 porsyento kan Nobyembre gikan sa 12.6 porsyento kan Oktubre.
Pigsaysay ni Speaker Romualdez na an pagbaba kan numero kan mga daing trabaho asin underemployment nangangahulugan na padagos an pagtalubo kan ekonomiya kan nasyon sa irarom kan administrasyon ni Presidente Ferdinand R. Marcos Jr. asin an mga oportunidad para sa mga namamanwaan na magtrabaho asin maghanapbuhay padagos na nagdadakol.
Kabali sa mga programang ini, segun ki Speaker Romualdez, iyo an Ayuda sa Kapos ang Kita Program (AKAP) asin an Assistance to Individuals in Crisis Situation (AICS) na pigmamayuhan kan DSWD, siring man an Tulong Panghanapbuhay sa Ating Disadvantaged/Displaced Workers (TUPAD) na pigpapautob kan DOLE. Suhestiyon kan kongresista na magkua nin training asin retooling coursing programs kan Technical Education and Skills Development Authority (TESDA) an mga daing trabahong Pilipino.
Pigsierto man ni Speaker Romualdez sa publiko na an Kongreso, urog na an Kamara de Representantes, padagos na magigin katuwang kan administrasyon ni Marcos sa paghihingoha kaini na masusteniran an pagtalubo kan ekonomiya asin maka-kriar nin dagdag na trabaho para sa mga Pilipino.
