NAGA CITY- Nagtutubod an Department of Environment and Natural Resources (DENR) Bicol na magkakaigwa nin dakulang pagbabago sa saindang ahensya katakod kan pagtukaw ni Sec. Roy Cimatu karibay ni Gina Lopez.
Sa entrevista kan Bombo Radyo Naga ki Engr. Roberto Sheen, assistant regional director kan DENR-Bicol, sinaysay kaini na dakula an pagbabago sa dalagan kan DENR sa pagtukaw ni Sec. Cimatu sa pwesto urog na ta saro ining retiradong heneral kan Armed Forces of the Philippines (AFP).
Naglalaom si Sheen na sa tabang ni Sec. Cimatu, mas magiging silag an saindang departamento asin mas magiging mahigot an pagpautob ninda nin mga polisiya para sa pagprotehir nin kapalibotan.
Katakod kaini, pigsierto man ni Sheen na dawa sisay an magtukaw komo DENR Secretary, padagos pa nanggad an paggibo ninda kan saindang mandato.
Pigtuga man ni Sheen na nanghinayang sinda sa pagkakareject kan Commission on Appointments (CA) ki Gina Lopez huli naman ta nagpahiling ini nin labing pagkamoot na maprotehiran an kapalibotan.
Kun natawan kuta na suboot nin mas halawig na panahon si Lopez komo DENR Secretary, mas mahihiling kan publiko an epekto kan saiyang mga polisiya urog na pag-abot sa pagpapauntok sa mga iligal na minahan sa Pilipinas.
Mientrastanto, susog sa DENR-Bicol, kinakaipuhan na tutukan ni Sec. Cimatu an manungod sa mga operasyon kan iligal na minahan sa rehiyon.
Tinawan doon man ni Sheen na nakaandam sinda na magsuporta o magkontra sa mga polisiya na ipapautob ni Cimatu sa saindang departamento.
Marurumduman na nakaguno nin manlaen laeng mga reaksyon hale sa mga Pilipino an pag-appoint ni Presidente Rodrigo Duterte komo DENR Secretary ki dating AFP Chief of Staff Roy Cimatu.
