NAGA CITY- Pigtuga ni Magdalo partylist Rep. Gary Alejano na madidipisilan ng mabaliktad an desisyon kan Supreme Court katakod kan deklarasyon nin Martial Law sa bilog na Mindanao ni Presidente Rodrigo Duterte.
Sa ekslusibong entrevista kan Bombo Radyo Naga ki Alejano, sinaysay kaini na madidipisilan na mabaliktad an nasambitang desisyon urog pa ta 11 mga Supreme Court justices an nagpabor digdi.
Sa ibong kaini, nakatalaan man na kaolayon kan kongresista an saiyang mga pag-iriba kun ano an saindang magiging sunod na lakdang asin kun igwa sindang plano na magsumiter nin motion for reconsideration.
Enot pa kaini, sinaysay ni Alejano na ikinamundo niya an naging desisyon kan korte suprema asin sinaysay na padagos pa nanggad siyang maninindugan na mayong basehan an Martial Law declaration sa bilog na Mindanao huli naman ta dapat nasentro sana ini sa parte kan Lanao del Sur asin Marawi City, kun saen nagpapadagos an labi sa sarong bulan ng kariribukan.
Posible man suboot na makaapektar sa masurunod na mga deklarasyon kan martial law an desisyon kan Supreme Court huli ta posibleng gamitong basehan kan nagkapira an anuman na kariribukan tanganing makapagdeklarar nin ley martial na dae na suboot sakop kan nakapalaog sa konstitusyon.
