Dae pa mapupuonan an pagbilog kan pigbubusol na Independent People’s Commission (IPC) ni Senate President Vicente “Tito” Sotto antes matapos an taon huli ta mas nakatuon ngunyan an atensiyon kan kongreso sa pag-aprubar sa 2026 General Appropriations Bill (GAA).
Sigun ki Sotto, nakatalaang aprubaran an proposed budget bill na naglalaog nin P6.793-trillion national budget sa Lunes, December 29.
Marurumduman na enot nang sinaysay ni Sotto na rerekasan kan mga senador an pagpasar sa prosopwestong IPC, na kaibahan sa mga prayoridad kan administrasuon ngunyan huli sa soboot anomalya sa flood control projects.
Dugang pa kan senador na pwedeng pag-ulayan an prosopwesto sa senado antes an Christmas break asin maipasar man ini sa masunod na taon.
Katakod kaini, pigsuhestiyon kan mga lehislador sa pigsunad na mga prosopwestong ley na tawan an IPC nin kapangyarihan na magpataw nin padusa o multa kontra sa indibidwal na dae nagsusunod sa mga legal na kasuguan.
Siring man an pagkakaigwa nin kakayanan na magsunad nin reklamo kontra sa mga kawani o sisay man na opisyal kan gobyerno na poporbaran na ulangan an imbestigasyon kontra sa katiwalian sa gobyerno.
Mientrastanto, nagpahayag man nin suporta an Department of Justice (DOJ) sa prosopwestong pagtatag nin bagong komisyon tanganing mapakusog an piggibong pagsisiyasat sa kurapsiyon sa gobyerno.
Sigun ki DOJ Spokesperson Polo Martinez, nagtitinir man soboot na preparado an saindang ahensiya tanganing magsagibo nin mga imbestigasyon sa mga kaso kan katiwalian kaibahan an mga pigrekomendang kaso sa flood control projects scandal kan Independent Commission for Infrastructure (ICI).
