Nilalaoman ngunyan kan Department of Health (DOH) an pagdakol nin mga pasyente sa mga pampublikong ospital.
Ini an kasunod kan anunsiyo ni Presidente Ferdinand Marcos Jr. sa saiyang ikaapat na report sa taumbayan na libre na an basic accommodation para sa mga pasyenteng ma-admit sa mga ospital kan DOH.
Sigun ki Health Secretary Ted Herbosa, enkaso man na maabot na an limit sa bed capacity sa mga pampublikong ospital, ita-tap an mga pribadong ospital tangani magtao nin 10% kan saindang mga kama na katampad kan basic accommodation kan government hospitals. An bayad sa mga pribadong ospital an sisimbagon kan Philippine Health Insurance Coporation (PhilHealth).
Alagad, may pagkakataon na kaipuhan pa man kan pasyente na magco-pay orog na kun ma-confine sa mga ospital na government-owned and controlled corporations (GOCC) siring na sana sa kidney institute, heart center, lung center asin children’s medical center, bagaman may mga benefit package man na pwedeng i-avail kan pasyente. Pighali man kan DOH an kahaditan dapit sa sustainability kan zero balance billing.
Sigun sa ahensiya, regular na nirereview an PhilHealth packages asin pinalawig pa an sakop kaini.
Siringpaman importante an pondong itatao sa ahensiya kun saen kaipuhan langkawan nin 15% an saindang maintenance operating expense (MOE) tangani magdagos-dagos an no balance billing.
Sa ibong kaini, dae man nahihiling na mataas an saindang taunang pondo sa 2026 huli ta nilalaoman na mapapamarhay pa an pagbubusol nin marahay na salud asin pagpugol sa mga helang sa paagi kan tamang pagkakan, ehersisyo, disiplina asin check up sa irarom kan YAKAP program.
