Dinipensa kan Palasyo kan Malakanyang an paggamit kan “executive privilege” kan pirang top government officials na nagsayumang magtao nin detalyes katakod sa pagkaka-arestar ki dating Presidente Rodrigo Duterte kan International Police (Interpol) sa isinagibong pagdangog kan Senado.
Sigun ki Palace Press Officer USec. Claire Castro, sa irarom kan Saligang Batas igwang “executive privilege” an Presidente kan nasyon asin magin an mga executive officials.
Obheto kaini na protehiran an anuman na sensitibong impormasyon na ihayag sa publiko.
Paliwanag ni Castro, kun nag-invoke nin executive privilege bako ining boot sabihon na pigtatago kan gobyerno an pirang importanteng impormasyon, orog na kun ini an igwang panghimasok na sa sarong branch kan ahensiya pasiring sa saro pang ahensiya kan gobyerno.
Paliwanag ni Castro igwang pagkakataon talaga na an nagkapirang mga importanteng isyu an dae dapat isapubliko orog na kun ini igwang koneksiyon sa security, diplomatic relations, military relations asin internal deliberations sa Executive Branch.
Nanindugan an Palasyo na mayong pigtatao an gobyerno katakod sa pagkaka-arestar ki dating Presidente Rodrigo Duterte na nahahampang sa kasong crime against humanity sa International Crimical Court (ICC).
Liwat na pigtawan-duon kan Palasyo na igwang legal na basehan an pag-arestar sa dating Presidente.
Sinaysay pa ni Castro na opinyon sana ni Senator Imee Marcos an saiyang pigsani na mayong legal na obligasyon an Pilipinas sa pag-arestar ki ex-PRRD.
