Mandato na sa presente an ley na dae na ipapadagos an paggamit kan mother tongue komo medium instruction o lenggwahe kan pagtutukdo.
Pig-enkaminar ni Senador Sherwin Gatchalian an Department of Education (DepEd) na siertuhon an tulos asin epektibong pagpapautob kaini.
Nakapalaman sa Republic Act No. 12027 na dae na ipagpapadagos an paggamit kan mother tongue komo lenggwahe sa pagtutukdo puon Kindergarten hasta Grade 3, bagay na pigmandato kan Enhanced Basic Education Act of Enhanced Basic Education Act of 2013 (Republic Act No. 10533) o an K to 12 Law.
Mabwelta an lengwahe sa pagtutukdo sa Filipino asin Ingles, apwera na sana kun igwang ibang itatalaan sa ley. Susog ini sa Article XIV, Section 7 kan 1987 Constitution. Gagamiton man an mga tataramon kan mga rehiyon komo auxliary media of instruction o mga katabanh na wika sa pagtutukdo.
Mientrastanto, pwede pa man ining ipautob sa mga monolingual classes an mga prinsipyo kan Mother Tongue-Based Multilingual Education (MTB-MLE) na nakapalaog sa K to 12 Law.
Marurumduman, an monolingual class sarong grupo kan mga estudyante na naggagamit kan sarong mother tongue asin naka-enroll sa sarong grade level sa sarong school year.
Sa sarong pag-aadal na pigsagibo kan Philippine Institute for Development Studies (PIDS) kan nakalihis na taong-2019, 9% sana sa 16, 287 na eskwelahan na-survey an nakasunod sa mga kondisyon na ini para sa pagpapautob ka MTB-MLE.
