NAGA CITY – Tinawan duon kan pamayuhan kan Department of Education-Iriga an importansya kan paggamit kan wikang Filipino sa pakikipag-ulay asin iba pang serbisyo.
Sa entrevista kan Bombo Radyo Naga ki Dr. Mariano de Guzman, Schools Division Superintendent kan DepEd-Iriga, sinaysay kaini na mantang naghahaloy naluluwas sa mga pigsasagibong mga esksaminasyon sa mga estudyante na mas nagbababa an saindang grado sa asignaturang Filipino kumparar sa iba.
Nagpapahiling sana soboot ini nin dakulang rason tanganing mas orog na pag-adalan asin gamiton an wikang Filipino baku sana sa eskwelahan kundi magin sa pakikipag-ulay sa ibang tawo.
Dugang pa ni de Guzman, haloy nang pigtataguyod kan saindang dibisyon an paggamit kan sadiring wika sa kamawotan na padagos ining manudan kan mga kaakian asin padagos na tangkilikon.
Saro pa sa mga posibleng rason kan pagbaba kan ranking kan Pilipinas sa pagbasa an huli ta an pigbabasehan soboot digdi an pagbasa kan mga aking Pinoy nin English bakung siring kan ibang nasyon na sadiri nindang wika an piggagamit.
Katakod kaini, padagos nindang pigbubusol an pagkondusir nin mga aktibidad na igwa nin kinaaraman sa pagselebrar o pagbisto sa sadiring wika kan satuyang nasyon orog na toyong Buwan ng Wika.
Sa siring na paagi baku sana an satuyang tataramon an pigtatawan nin importansya kundi an paggamit asin pag apresyar sa satuyang pambansang bado na karaniwang piggagamit sa mga siring na event.
An mga ini kaya an nagseserbing simbolo asin pagkakabistohan kan Pilipinas na nagpapahiling man kan satuyang kultura asin tradisyon.
