NAGA CITY– Prangkang sinaysay ni Sorsogon First District Rep. Evie Escudero na mas marhay na mahale na sana sinda sa kinakaputan na mga posisyon sa kamara kaysa nagboto nin ‘yes’ sa pigtutulod na reimposition nin death penalty sa nasyon.
Sa ekslusibong entrevista kan Bombo Radyo Naga ki Escudero, sinaysay kaini na antes siya nagdesisyon asin nagboto nin ‘No’ sa nasambitang propwestong ley, nagkaigwa muna nin konsultasyon sa saiyang mga konstituwentes asin nagluwas suboot na 80% sa mga ini ang dae pabor sa death penalty.
Tinawan doon kan bicolanang opisyal na pwesto sana an mawawara sa mga kongresista mantang an konsensya man an saindang magiging kalaban enkaso nagpabor sinda sa nasambitang propwestong ley.
Mientrastanto, aminado man siya na komo chairman kan committee on basic education and culture, nakakamundo na hahaleon siya sa komite alagad kinakaipuhan suboot na akuon na sana an magiging desisyon kan House Leadership.
Nagtutubod man si Escudero na sapiritan asin tinilok kan House leadership an mga kongresista huli ta nagluluwas na mayo ng diretsos an mga ini na magboto basado sa saindang konsensya katakod kan death penalty bill.
