Pigsierto kan Department of Transportation (DOTr) asin Land Transportation Franchising and Regulatory Board (LTFRB) na preparado na sindang ipautob an pagheheras kan fuel subsidy para sa mga driver asin operator kan pampublikong lunadan.
Ini an kasimbagan sa direktiba ni Presidente Ferdinand R. Marcos Jr. tangani matabangan an transport sector sa tahaw kan sunod-sunod na oil price hike, kawsa kan naglalalang tensyon sa Middle East.
Sigun sa DOTr, makatatanggap ng subsidiya ang lahat ng kwalipikadong driver asin operator, dawa dae pa sinda parte kan consolidation. Obheto kan programa na magin inklusibo tangani masimbagan an epekto kan paglangkaw kan presyo kan langis sa bilog na sektor kan transportasyon.
Presenteng nakikipag-koordinar an DOTr asin LTFRB sa mga ahensya siring na sana kan Department of Energy (DOE), Department of Interior and Local Government (DILG), Department of Information and Communications Technology (DICT), asin iba pa para sa mas marikas na pagheheras nin ayuda.
Siniguro kan DOTr na iluluwas an subsidiya sa orog na marikas na panahon alinsunod sa direktiba kan Presidente na parikason an implementasyon kan programa.
Mientrastanto pig-inkaminar kan Department of Energy (DOE) an publiko na magtipid sa pagkonsumo kan langis. Kasunod man ini kan ipinautob na dakulang langkaw presyo sa petrolyo na malabo pang tulos na magpreno huli sa nagpapadagos na tensiyon sa Gitnang Silangan.
Sigun sa DOE, nagkapira sa pwedeng gibuhon kan mga motorista tangani makatipid an carpooling, paggadan sa lunadan kun dae man nag aandar, pag-check sa pressure kan gulong asin regular na maintenance kan lunadan.
Enot nang inanunsiyar kan DOE na nagtugot an oil companies na gibuhong padikit-dikit an pagpapautob kan taas presyo sa petrolyo ngunyan na semana. Sa ngunyan, ngunyan na aldaw nakatalaang makipag-meeting an Energy Department sa kada oil company tangani pag-ulayan kun pano mapapagian an pasanon kan mga nasa pobreng sektor.
