NAGA CITY- Pinag-ulayan sa pigkundusir na workshop dapit sa Typhoon Kristine an pag-analisar sa nagin epekto kan bagyo sa ekonomiya, infrastructure asin komunidad.
Sa nagin paghampang sa mga kagawad kan media ni Renne Gumba an pamayo kan PSO-Naga, sinaysay kaini na sa pamamayo kan City Planning and Development Office kapartner an Naga City Peoples Council na pinag-atenderan kan mga opisina kan LGU-Naga asin mga grupo na aktibong nagtarabang sa panahon kan kalamidad, pinag-urulayan an dapit sa mga gigibuhon na paagi tanganing dae na mautro pa an naeksperyensyahan sa nakalihis na Bagyong Kristine kun saen labi an pagbaha sa haros gabos na area sa siyudad.
Sigun pa sa opisyal, maikokonsederar na extra ordinary an nangyaring pagbaha huli sa epekto kan climate change.Apwera digde, nagkapira pa sa napag-ulayan an dapit sa budget, resilience kan siyudad sa panahon kan kalamidad.
Pigtawan duon kan opisyal na kaipuhan magin preparado kan publiko sa panghaluyan na epekto kan climate change nin huli ta nagdadara ini nin extreme weather conditions.
Pigsaysay pa ni Gumba na dapat naipapaliwanag nin tama an konteksto kan Climate Change sa publiko tanganing maglangkaw an lebel kan preparedness kan lambang tawo tanganing magkaigwa nin marhay na adaptation kan mga programa na eksakto sa pangangaipuhan kan presenteng panahon.
Sa ngunyan, pigsierto na sana kan opisyal na padagos an saindang ginigibong lakdang tanganing magin preparado an bilog na siyudad sa anuman na huma na dara kan climate change.
