NAGA CITY- Pigbubusol ngunyan kan sarong konsehal sa syudad nin Naga an sarong proponidong ordinansa na mag-eestablishar nin data center kan syudad.
Sa nagin patara-tara ni Naga City Councilor Lito del Rosario, sinaysay kaini na an obheto kan nasambitan ng ordinansa an mas ma-improve kan syudad an monitoring and evaluation kan mga programs, projects, and activities na piggigibo kan LGU.
An nasambitan ng data center an magseserbi komo repository kan gabos na mga dokumento kan LGU; ma ensure kan integrity asin accountability kan mga dokumentos susog sa data privacy law.
Sa siring na paagi, mas magigin marekas an pag request nin mga kaipuhan na dokumentos asin malilikayan na an pagtuturukduan kun sain dapat na kuanon an mga ini.
Dugang pa ni del Rosario, na an pagkakaigwa kan nasambitan ng data center an makakatabang sa pag-establishar tanganing magin mas progresibo an syudad nin Naga.
