Marahay an pagkakasararo asin pagkakasundo kan mga lider kan nasyon, alagad dapat ining nakatuon sa karahayan kan pangkagabsan.
Sigun ki Fr. Jerome Secillano, executive director kan CBCP-Episcopal Commission on Public Affairs, bilog na inaako kan simbahan an pahayag ni Presidente Ferdinand Marcos Jr. na bukas ining makipagkasundo sa pamilya Duterte—sa ibong kan naglalalang tensyon sa pag-ultanan kan duwang kampo.
Hurot kan Padi, kun andam an Presidente na makipagkasundo, dapat ining isaalang-alang man kan kampo kan mga Duterte para sa kapakanan kan bilog na nasyon asin kan mga Pilipino.
Marurumdumang nagpuon an alitan kan duwang pinakahalangkaw na lider kan nasyon kan nakalihis na Enero 2024.
Si VP Sara Duterte an piglalaomang maatubang sa impeachment trial sa Senado sa akusasyong may kinaraman sa sinasabing pagbalgar sa Saligang Batas asin iba pang mga alegasyon kan katiwalian asin pang-aabuso sa kapangyarihan.
Makapirang utro man na pigsayumahan no Presidente Marcos na sinusuportaran kaini an impeachment kontra sa dating kaalyado sa politika.
Sa katatapos sana na 2025 national and local elections, kadaklan sa mga kaalyado ni Marcos ay nanggana mantang pirang kaalyado kan mga Duterte an dae man nagtrayumpo. Sa kabila kaini, nagpahayag si Presidente Marcos nin preparasyon na makipag-ulay asin makipagkasundo para sa ikakarahay kan nasyon.
