NAGA CITY-Nagbulos an mga tagasuporta ni Vice President Leni Robredo subago sa kapitolyo probinsyal sa banwaan nin Pili kun saen dinara an mga ballot boxes hale sa manlaen laeng banwaan sa Camarines Sur na kabale sa gigibuhong recount katakod kan nagpapadagos na electoral protest ni dating Sen. Bongbong Marcos laban sa Bicolanang opisyal.
Personal na nagbantay sa pag-ako kan Presidential Electoral Tribunal (PET) kan mga ballot boxes an bilog na Sangguniang Panlungsod kan Naga sa pangengenot ni Vice Mayor Nelson Legacion.
Igwa man nin grupo kan mga kababaihan na nagpasiring sa legislative building kan probinsya para mahiling an pangyayari.
Presente man an legal counsel kan bise presidente na si Atty. Bernadette Sardillo na kompyansang papabor sa saindang lado an magiging resulta kan pagdangog kan nasambitang protesta.
Alagad, kontra sa naenot na schedule na hasta sa Byernes sana an pagkolektar kan haros 2,000 balota, posible suboot na mag-abot pa nin hasta sa enot na semana kan Pebrero an pagkolektar huli sa mabusising pag-inspeksyon kan mga inaako na balota asin mga election paraphernalia.
