Laoman an panibagong paglangkaw kan pamasahe sa mga pampasaherong eroplano sa masunod na bulan.
Ini matapos na itaas kan Civil Aeronautics Board (CAB) an fuel surcharge para sa bulan nin Nobyembre.
Segun sa CAB, nasa Level 17 na an fuel surcharges poon Nobyembre 1 sagkod 15.
An nasabing Level mas halangkaw kumpara sa dating Level 16 poon Oktubre 16 sagkod 31.
Sa Level 17, maniningil an mga airlines nin poon P559 sagkod P1,635 kada pasahero para sa domestic flights.
Mantang igwang P1,846.10 sagkod P13,726.58 na dugang na babayadan para sa mga international flights.
Ini mas halangkaw sa Level 16 na mga surcharges na igwang P525 sagkod P1,535 para sa domestic flights mantang igwang P1,733.76 sagkod P12,891.29 para sa international flights.
An mga surcharges kinokolekta kan mga airline companies huli sa padagos na paglangkaw kan presyo nin produktong petrolyo sa nasyon.
