Tinutulan kan National Union of Peoples’ Lawyers (NUPL) an paglubong ki dating Senate President Juan Ponce Enrile sa Libingan ng mga Bayani sa Fort Bonifacio, Taguig City.
Sa sarong statement, sinaysay kan grupo kan mga human rights lawyers na an paglubong ki Enrile sa Libingan ng mga Bayani an pagbalewala sa mga danyos na winalat kan martial law asin makakaraot sa pundasyon para sa bayad-danyos, pagbawi kan mga ari-arian asin paghilom kan lipunan gikan sa kadahasan.
Para sa grupo, an nasambitan ng lakdang an seryosong pagbaluktok kan historya asin malupit na pagiromdom kan parehong rebisyonismo kan ilubong si dating Presidente Ferdinand Marcos Sr., sa parehong sementeryo kan nakalihis na taong 2016.
Hurot kan grupo na an Libingan ng mga Bayani, an bakong himlayan para sa mga nangraot kan demokrasiya o nangenot sa sistemetikong pang-aabuso, kundi pig-kriar ini para sa mga nagin inspirasyon asin marhay na halimbawa, na mayo soboot kina Marcos Sr asin Enrile.
Sigun sa grupo, si Enrile na nagsirbing defense minister sa iraraom kan Marcos Sr administration, an nangenot sa sentro kan martial law, siring kan mahewasang pag-arestar pagkulong, pagtorture, pagkawara kan mga indibidwal, media shutdowns, asin pagbuwag sa mga kalayaaang sibil.
Siring man, sinaysay kan grupo na an pagkalas ni Enrile gikan sa Marcos Sr. administration kan taong 1986 an dae mapupura an saiyang mga kasalan.
Ngunyan na aldaw isinagibo an necrological service para ki Enrile sa Senado komo dating Senate President.
Magkakaigwa nin public viewing sa burol kan nagtalikod na sa kinaban na Senate President sa Biyernes, Nobyembre 21, asin ilulubong sa Sabado, Nov. 22 sa Libingan ng mga Bayani, basado sa pagkumpirmar kan saiyang aki na si Katrina Ponce Enrile.
