NAGA CITY- Nahilingan nin pagluya an byahe kan mga parapadyak sa ibong kan dakol na tawo ngunyan na Kapaskuhan.
Sa entrevista kan Bombo Radyo Naga ki Bryan Cuerdo- Pedecab Driver, sinaysay kaini na mayor na rason iyo an mga colurom na tricycle na iyong mahigot na kakompetinsya kan Pedicab.
Nasa 10 pesos an saiyang pigsisingil sa kada pasahero na kun sain igwa nin maximum na duwa an saiyang piglulunad.
Katakod man kaini, pig aabot nin haros kabangang oras an saiyang paghahalat sa mga pasahero kaya man siring na sana kadipisil an saiyang naeeksperyesnyahan uru-aldaw.
Sigun ki Cuerdo, dati na nindang pigreklamo an nasambitan ng mga colurom na tricycle alagad hasta sa ngunyan mayo pa man giraray nin nagigin aksyon. Marahay an nagigin kita ninda kan mga nakalihis na mayo pa an presensya kan mga kakompetensya alagad sa presente, mas nagluluya pa an saindang paghanap buhay.
Komo solo parent na may duwang aki, aminado si Cuerdo na dawa papano nakaka sustiner man an pagpapadyak sa saindang pang uru aldaw huli ta hababa na an 500 pesos na saiyang nakukua sa pagkayod.
Sa ngunyan, hagad pa kaini na magibuhan nin paagi an saindang agrangay komo parapadyak orog na ta kadaklan sa sainda ini man sana an sulamenteng hanap buhay.
