NAGA CITY – Para ki House Speaker Ferdinand Martin Romualdez, an ₱29 Rice Program ni Presidente Ferdinand “Bongbong” Marcos Jr. an sarong importanteng lakdang tanganing masimbagan an pagkagutom sa nasyon.
Pahayag ini ni Romualdez kasunod kan pagpupuon kan programa sa irarom kan Department of Agriculture (DA) kun saen mababakal an ₱29 kada kilo nin bagas.
Kuwalipikadong makinabang digdi an mga benepisaryo kan Pantawid Pamilyang Pilipino Program (4Ps), mga senior citizens, persons with disabilities (PWD) asin solo parents. Naglalaom si Romualdez na an trial sites na 10 lugar sa Metro Manila asin Bulacan an madudugangan pa sa mga masunod na aldaw hasta sa makaabot na ini sa Visayas asin Mindanao asin matabangan an 6.9 milyong pamilya sa bilog na nasyon.
Duon ni Romualdez, an programa an saro man nin komprehensibong estratehiya kan gobierno tanganing masimbagan an inflation asin masierto an seguridad kan pagkakan para sa namamanwaang Pinoy.
