Pinag-uulayan ninda President Ferdinand Marcos Jr. asin dating United Nations Secretary-General Ban Ki-moon an pagpapapusog kan climate resilience asin sustainability sa Pilipinas.
Sa courtesy call sa Malacañang, pigpasalamatan ni Presidente Marcos si Ban huli sa padagos kaining adbokasiya para sa kapalibutan asin sa pagtabang sa mga nasyon na labing pigtamaan kan climate change, kaibahan an Pilipinas.
Nagpasalamat man si Ban sa mainit na pagsabat asin nagpahayag nin paglaom na tolos makakabuhat an nasyon gikan sa danyos na winalat kan Bagyong Tino asin Uwan.
Marurumduman, nag-abot si Ban sa nasyon para sa Trans-Pacific Sustainability Dialogue sa Makati City, kun saen nangapudan ini sa international community na pakusugon an suporta sa mga nasyong apektado kan mga kalamidad kawsa kan climate change.
Sa meeting, pigsierto ni Ban an padagos na suporta kan Global Green Growth Institute (GGGI) sa mga programa kan administrasyon para sa sustainable asin climate-resilient development.
