NAGA CITY- Mawot na maibwelta liwat sa siyudad nin Naga an antensyon kan mga kaakian na magbasa nin libro.
Sa nagin paghampang sa mga kagawad kan media ni Naga City Administrator Elmer Baldemoro, sinaysay kaini na sa papamayo ni Mayor Nelson Legacion mawot kaini na ma-divert an atensyon kan mga kaakian na estudyante na magbasa liwat nin libro orog na sa panahon ngunyan na nasa Digital Age asin haros nasa online nakapokus an mga ini.
Pigheras pa kan opisyal na sa presente na padagos an paglalapigot kan lokal na gobierno kan Naga katabang an mga opisyal kan Naga City Public Library orog na sa pagtugdok sa kada eskwelahan asin barangay kan mga library tangani na maipautob an obheto na madivert an atensyon kan mga ini na dae maglaom sa social media asin ma-enkaminar liwat an mga estudyante sa pagbasa nin libro.
Dugang pa kaini na kun i-institutionalize an an programa kinakaipuhan na magkrear nin ordinansa.
Mientrastanto, an programa an nakalinya katabanh an Sanguniang Kabataan sa pig-aapod na Barangay Learning Center kun sain an lokal na gobierno an nagtatao nin mga computer asin printer orog na kun igwa nin mga resarch na kinakaipuhan kan mga estudyante sa manlaen-laen na lugar sa syudad.
