Pig-anunsyar kan Department of Social Welfare and Development (DSWD) kan nakalihis na semana na target kan ahensiya na ipautob sa katapusan kan taon an unified ID system o pinagsarong Identifiation card kan Persons with Disability (PWD).
An lakdang na ini kan DSWD an obhetong labanan an padagos na isyu kan pekeng PWD IDs na piggamit tanganing makakua kan dae otorisadong diskwento sa mga restaurant asin iba pang negosyo.
Kasuarin sana binatikos kan Restaurant Owners of the Philippines an mahewasang pang-aabuso sa pekeng PWD IDs na nagdara nin matinding pressure sa mga establisyemento.
Asin kasuarin sana man kan isinagibo kan mga otoridad an sarong raid sa sarong sadit na operasyon sa Manila kun saen soboot pigpapagibo an mga pekeng PWD IDs na ipigtatao kan mga lokal na gobyerno gikan sa Quezon City, Manila, Pasig, Muntinlupa, asin Angat sa Bulacan.
Marurumduman kan nakalihis na Disyembre kan 2024, nagtao nin patanid an Bureau of Internal Revenue (BIR) kontra sa pagpapabakal asin paggamit kan mga pekeng PWD IDs, asin sigun ki Senador Sherwin Gatchalian, nagpakol sa P88.2 billion an nawawarang buwis kan gobyerno kan nakalihis na taong-2023 huli sa pamemeke kan soboot na PWD IDs.
Sa presente, magkakaiba an itsura kan PWD IDs depende sa pag-issue kan mga local government unit.Sa irarom kaya kan bagong sistem, magkakaigwa ini nin sarong standard na disenyo tanganing malikayan an pandaraya.
Ipigheras ni DSWD, DSWD, Assistant Secretary Irene Dumlao na an unified PWD ID system an masairarom sa pilot implementation stage na nagpuon kan nakalihis na Enero hasta Hunyo kan taong-2025, asin an DSWD an presenteng nagfa-finalize kan mga terms of reference kan nasambitan ng unified system.
Tanganing masierto an seguridad kan mga datos kan PWDs, nakikipagtabang an DSWD sa National Privacy Commission.
An ahensiya an nakikipag-koordinar man sa Department of Information and Communications Technology (DICT) asin Philippine Statistics Authority (PSA) tanganing siertuhon an marhay na pagpapautob kan bagong sistema.
An bagong PWD IDs an magkakaigwa nin mga security features, siring kan Radio Frequency Identification (RFID) technology.
Apwera pa digde, magkakaigwa nin web portal na matugot sa mga establisyemento na i-verify an pagigin lehitimo kan PWD ID kan sarong tawo.
Sa irarom kan Republic Act 10754, an mga PWDs an igwang karapatan na makapag-avail nin 20% na diskwento asin VAT exemption sa mga partikular na produkto asin serbisyo.
