NAGA CITY- Padagos na pagproteher sa derechos kan gabos na mga kababaihan ini an pangapudan kan Camarines Sur Police Provincial Office kasabay sa pagselebrar kan 18-Day Campaign to end violence against women ngunyan na bulan kan Nobyembre.
Sa entrevista kan Bombo Radyo Naga ki PCPT. Liza Jane Alteza, PIO kan CSSPO, sinaysay kaini na kada taon pigseselebrar an nasambitan ng aktibidad sa pangengenot kan Philippine Commission on Women.
Sigun sa opisyal, sa aktibidad na ini, ipinapangapudan sa gabos an pagrespeto asin paglikay sa anuman na klase nin pangungulog, pang-aabuso sa mga kababaihan.
An nasambitan ng campaign pig-iinkaminar na makisumaro an gabos na mga tawo bako sana an mga kapulisan, nasa Local Government Unit kundi magin an iba pa man na sektor o grupo sa kamawotan na mawakasan na an mga siring na kadahasan na pigbibilog kan manlaen laen na klase siring kan physical violence, psychological violence, economic abuse.
Dugang pa ni Alteza, maski labi an paglalapigot kan saindang lado na malikayan an pang-aabuso sa mga kababaihan igwa pa man giraray naiirehistro na siring na insidente.
Mandato kan saindang halangkaw na opisyal na orog pang papusugon an kampanya sa paagi kan VAWC Desk Officers na iyo man an nakatutok sa siring na mga kaso.
Marurumduman, sa kada barangay igwa nin VAWC Desk Officers katabang an bilog na pamayuhan kan barangay, brgy tanod sa pag asister sa mga kababaihan na nagrereklamo na sinda an biktima kan pang-aabuso.
Sa ngunyan, padagos an pangapudan kan opisyal sa gabos na biktima na dae matakot na magdulok sa mga kapulisan tanganing tolos na maaksyunan an saindang kaso asin malikayan an malala pang pangyayari.
