NAGA CITY- Nairehistro an pagrasay nin mga gapo o pig-aapod na rock slide sa may parte kan Sitio Garang 72 Barangay Patitinan, Sagñay Camarines Sur.
Sa entrevista kan Bombo Radyo Naga ki Noel Pielago, MDRRMO Operation Officer kan Sagñay, sinaysay kaini na an nasambitan ng lugar an National road na boot sabihon gabos inaagihan kan mga behikulo mapa light o heavy vehicle.
Alagad sa ibong kaini, nagtitinir na passable pa man giraray an Sagñay-Tiwi road nin huli ta sa gilid sana man kan tinampo nahulog an nasambitan ng mga gapo. Sigun pa sa opisyal, dae man apektado an tinampo kun kaya salbado na agihan an lugar.
Sa ibong na lado, pigtawan duon ni Pielago na mandato kan saindang alkalde na an MDRRMO kan Sagñay an mayong Christmas break nin huli ta kinakaipuhan kan mga ining mag-monitor sa bagyo asin sa sitwasyon kan saindang lugar.
Pigsierto pa kan opisyal na naka-alalay asin tolos na makakapagresponde an saindang mga personahe nin huli ta activated an gabos na PDRRMO.
Sa ngunyan, pig-enkaminar na sana ni Pielago an gabos na padagos na magin updated sa mga bagong abiso tanganing malikayan an anuman na untowards incident.
