NAGA CITY- Nagin matrayumpo soboot an pagsabak kan CBSUA-Calabanga sa pigkundusir na Regional Tertiary Press Conference 2025 sa Virac, Catanduanes.
Sa entrevista kan Bombo Radyo Naga ki Edwin Breva Jr, Adviser of the Scanner an Official Student Publication CBSUA-Calabanga, sinaysay kaini na nagpakol sa 400 participants an nakisumaro na mga State Universities asin Colleges sa Bicol Region sa nasambitan ng event.
Katakod kaini, maogma man na pigheras ni Breva na duwang estudyante gikan sa saindang eskwelahan an na-qualified sa sunod na kompetisyon iyo an Luzon-wide Higher Education Press Conference.
Sigun sa opisyal, pigtatarget ninda na malampasan o matampadan an performace kan ibang mga State Universities asin Colleges para sa sunod na ikukundusir na kompetisyon.
Mientrastanto, antes man an kompetisyon, pirme soboot ninda na pigpapayo sa mga estudyante na e-enjoy an proseso kan kompetisyon orog na ta matitibay man an saindang mga estudyante asin desidido na manggana.
Sa ibong na lado, pigsierto man kaini na pigsasabuhay ninda an pagproteher sa kun ano an totoo orog na an pagpapaluwas kan lehitomong mga impormasyon na iyo man an kaipuhan kan publiko.
Apwera digde, pig-aabisuhan man ninda an saindang mga campus journalist na magin malikay asin sa panig sana kan totoo partikularmente an pagbubusol sa press freedom.
Ini soboot an pinaka-value kan pagigin journalist na kaipuhan bitbiton saenman makaabot o anuman an tatahakon pa na mga desisyon sa buhay.
