NAGA CITY- Nagin generally peaceful an kakatapos pa sana na Christmas celebration sa bilog na probinsiya kan Camarines Sur.
Sa entrevista kan Bombo Radyo Naga ki PCPT. Liza Jane Alteza, Public Information Officer kan CSPPO, sinaysay kaini na puon sa Simbang gabi hasta sa kasuudma, December 25, 2024 mayong nairehistrong insidente katakod kan nasambitan ng kasiributan.
Sigun pa ki Alteza, nagin mahigot an pagbabantay kan mga kapulisan orog na sa mga matatawong lugar siring kan plaza, market, malls asin iba pa.
Haros 90% kaya kan saindang mga personahe an yaon sa mga kanya-kanyang area of deployment tanganing masierto na salbado ang bilog na durasyon kan pagselebrar nin pasko.
Apwera digde, maogma man na pigheras kan opisyal na mayong naireport na naputukan kan nakalihis na pasko na maikokonsederar na dakulang improvement.
Dugang pa kan opisyal, sa presente, padagos an sainda man na pagbabantay sa may parte kan Andaya Highway huli sa piglalaoman na pagdagsa pa kan mga lunadan na malaog asin maluwas nin Camarines Sur. Katakod digde, ngunyan na aldaw, naeeksperyensiyahan an light to moderate na kamugtakan kan trapiko sa nasambitan ng lugar.
Sa ngunyan, liwat na sanag pigsierto kan opisyal na yaon pirme ang presensiya kan kapulisna orog na an pagtatao nin asistensiya para sa pagsabat kan bagong taon.
