TINAWANG-DUON kan opisyal kan Department of Education na dae required an pagsusulot nin Toga ngunyan na maabot na ang graduation. Sa entrevista kan Bombo Radyo Naga ki Atty.
Salvador Bogs Pelingon, Division Information Officer kan DepEd-Camarines Sur, sinaysay kaini na mayo man soboot na specific na required na attire para sa graduation kan mga estudyante na ma-gradwar.
Sigun pa sa opisyal, dae man requirement sa graduation an pagkakaigwa nin sablay, pagsulot nin uniform o anuman na bado para sa okasyon na ini.
Tanganing magkasararo kun ano an susuluton sa graduation, kaipuhan na pag-ulayan ini sa PTA meeting bago an graduation tanganing magkasundo an mga magurang, faculty asin mga estudyante kun ano an attire sa pag-gradwar.
Kaipuhan sana soboot pare-pareho an attire kan mga estudyante tanganing dae magkaigwa nin kurumparahan asin dae magkaribok.
Mawot sabihon, nakadepende an attire sa mapag-uulayan sa PTA meeting tanganing magin organisado an importanteng okasyon na ini para sa mga estudyante. Mangyayari an graduation puon Marso nakadepende pa sa mga eskwelahan.
Sa mga ma-gradwar man, tinawang-duon ni Pelingon na mayo nin inaapod na “mass promotion” sa mga estudyante nin huli ta ini-evaluate ining marhay kan mga paratukdo kun deserving an aki na magradwa o dae.
Sa ngunayan, nagpagirumdom na sana si Pelingon sa mga magurang na pirming mag-atendir sa meeting na isinasagibo tanganing aram asin magkaigwa nin pagkakataon na umuyon o dae mag-uyon sa napaguulayan asin tanganing magin organisado an nararaning graduation.
