NAGA CITY- Pigtawan duon kan legal counsel ni Representative Leila De Lima na an saindang pagsunad nin reklamo sa Department of Justice kontra sa mga nagkapirang prosecutors an puon pa sana sa pagpapanimbag sa mga nasa likod kan pang-aabuso kan saindang kapangyarihan.
Sa entrevista kan Bombo Radyo Naga ki Atty Dino De Leon, Legal Counsel ni Mamamayang Liberal Party-List Representative Leila de Lima, sinaysay kaini na kaipuhan nang mapanimbag an siisay man na mga prosecutors na dae nag-uuntok sa paghabol sa kaso ni De Lima na pig-abswelto na man asin pig-dismiss an kaso sa hukuman.
Marurumduman, kan nakalihis na Agosto 14, pormal na nagsunad nin reklamo sa Department of Justice (DOJ) an kampo ni De Lima kontra sa mga prosecutors kan DOJ.
Sa pigsumiter na pormal na reklamo nakapalaman digde an grave misconduct and gross ignorance of the law kontra sa nasambitan ng mga prosecutors.
Sigun ki De Leon, an lakdang na ini an enot pa sana sa mga nagkapirang serye kan saindang aksyon na gigibuhon tanganing mapanimbag an nasa likod kan pagkakakulong kaini sa laog kan haros pitong taon maski mayo man soboot nin kasalan.
Dugang pa kan abogado, nagsapo nin labing kadipisilan si De Lima huli sana sa paninindugan kaini asin paglaban kontra sa dating administrasyon kun kaya dapat na magkaigwa nin katarungan dapit digde.
Sa ngunyan, naglalaom na sana si De Leon na masarig sainda an ley asin mapanimbag an dapat na manimbag.
