NAGA CITY- Pig-orgulyo kan sarong Kapitan sa syudad nin Naga an pagsunod, pagtatao nin suporta, asin pagigin kumbinsido kan mga konstityuwentes sa saiyang liderato.
Sa entrevista kan Bombo Radyo Naga ki Alfonso Rodriguez (Barangay Captain, San Felipe, Naga City), sinaysay kaini na nagpuon an saiyang pamamayo sa nasambitan ng Brgy kan nakalihis na taong 1997 komo sarong Brgy Secrtetary, na kun saen panduwang termino kaidto ni dating alklade kan Naga City na si Jessi Robredo.
Hasta sa narealizar kaini kun gurano kapagal an trabaho kan mga Brgy Secretary, kaya man taong 2002 pinorbaran kaining magdalagan komo Brgy Kagawad.
Pag abot kan 2007 election, nagdalagan giraray ini para sa panduwang termino, giraray nag top notcher ini.
Hasta sa mag abot sa puntong magin alkalde ini, kan magtalikod sa kinaban an saindang Kapitan kan mga panahon na ini. Taong 2010 kan magdalagan liwat sa pagka Kapitan sa Brgy, alagad sa panahon na ini dae na pinalad pa.
Alagad dae ini nawaran nin pag laom, huli ta naghinguha giraray ini para sa masunod na paglaban liwat. Pigsierto soboot ni Rodriguez na mapanuan an gabos na mga pagkukulang kan ini primerong nagtukaw komo Brgy Captain. 2013 election kan manggana liwat ini asin makabalik sa dating posisyon hasta sa presenteng taon na pantulong termino na kaini sa Brgy San felipe.
Aminado pa si Rodriguez na dae ini dawa nuarin man nagpa apekto sa anuman na mga panraraot sa saiya komo ama kan Brgy, nagtutubod kaya soboot ini na komo sarong serbidor sa komunidad, dae man makakayang mag pabor an gabos sa sarong tawo.
Pirme nang igwa nin mga siring na komentaryo, kaya man piggagamit na sana soboot kaini an manlaen laen na mga opinyon komo sarong paagi tangani mas maparahay pa an saiyang pamamayo.
Sa huri, pigkakaputan kaini an saiyang pananaw, na makalihis man an eleksyon, nag suporta man an sarong kahimanwa o dae, itatao man giraray kaini an 100% na pagsirbi asin pagpaabot nin tabang orog na kun labing nangangaipuhan.
