Poraml nang pigbukasan ni Presidente Ferdinand R. Marcos Jr. an ika-65 na Palarong Pambansa sa Ferdinand E. Marcos Memorial Stadium sa Laoag City, Ilocos Norte.
Igwang temang “Nagkakaisang Kapuluan”, obheto kan taunang pambansang multi-sport na kompetisyon na ibusol an Physical Education, aramon an mga bagong talento sa sports, pararumon an pagigin amgigo asin pambansang pag-orgulyo sa parte kan mga estudyante na atleta gikan sa manlaen-laen na lugar sa Pilipinas.
An taong ini, tampok sa Pakawat an 24 na regular na sports kaibahan an atletiks, basketball, volleyball, gymnastics, taekwondo, asin swimming.
Ipinabisto man an weightlifting komo sarong demonstration sport, mantang an kickboxing, girls’ football, asin girls’ futsal an gaganapon komo mga exhibition events.
Apwera digde, igwa man special category para sa mga atletang igwang kakundian, na tampok sa mga kawat para-athletics, para-swimming, bocce, asin goalball.
Pigkakarkulong 15,000 delegado gikan sa 20 athletic associations an kaibahan sa 18 rehiyon kan Pilipinas, National Academy of Sports, asin Philippine Overseas Schools an mapartisipar sa sarong semanang kompetisyon puon ngunyan, Mayo 24 hasta 31.
Liwat na ginanap an Palarong Pambansa sa Ilocos Norte makalihis an labi limang dekada, kan taong-1968 sa panahon ni Presidente Ferdinand E. Marcos Sr.
An opisyal na logo kan Palaro an nagtataong-pugay sa makasaysayang pagbweltada sa lugar, gamit an disenyo na gikan sa inabel asin igwang estilong imahe ni Teófilo Yldefonso, an pigkonsiderar na “Ilocano Shark” asin primerong Olympic medalist kan Pilipinas na ipinangaki sa Piddig, Ilocos Norte.
