Nagtalaga an Malakanyang nin caretaker kan nasyon mantang nasa United Arab Emirates (UAE) si Presidente Ferdinand Marcos Jr. para sa working visit.
Sinaysay ni Presidential Communications Office (PCO) Acting Secretary Cesar Chavez, na sinda Executive Secretary Lucas Bersamin, Justice Secretary Jesus Crispin Remulla, asin Agrarian Reform Secretary Conrado Estrella III an itinalagang caretaker kan nasyon.
Si Marcos an nasa UAE tanganing makipaghilingan ki His Highness Sheikh Mohamed bin Zayed Al Nahyan sa Abu Dhabi.
Sinaysay man ni Philippine Ambassador to the UAE Ambassador Alfonso Ver na an pagbisita ni Marcos an nagmamarka kan sarong makabuluhan asin simbolikong lakdang sa historya kan satuyang relasyon, mantang pinagseselebrar an ika-50 anibersaryo kan pormal na ugnayang diplomatikal sa pag-ultanan kan Pilipinas asin kan UAE.
Naglalaom man an Palasyo na mapipirmahan an sarong kasunduan sa pagbisita ni Marcos sa UAE.
Marurumdoman na si Vice President Sara Duterte an itinatalagang caretaker kan nasyon kun nasa official trip si Marcos.
