Sinimbag kan Malacañang an paghagad nin tawad ni Vice President Sara Duterte sa publiko katakod kan soboot pagtabang kaini ki Presidente Ferdinand Marcos Jr. na mahalal asin sa padagos na problema kan pagbaha na pigkokonektar kaini sa korapsiyon kan gobyerno.
Sigun ki Palace Press Officer Claire Castro, kadakol pang isyu na dapat ipaliwanag asin ihagad nin tawad kan Bise Presidente sa taumbayan.
Sinaysay ni Castro na dapat soboot enoton ni VP Duterte an paghagad nin tawad sa mga biktima kan extrajudicial killings asin an nagin pahayag kaini kaidto na igwang bistadong assassin asin nagsugo soboot na ipagadan sinda Presidente Marcos Jr., First Lady Liza Araneta-Marcos, asin dating House Speaker Martin Romualdez enkaso igwang mangyari sa saiya.
Binanggit man kan Palasyo an soboot pagpapalakop nin salang impormasyon, mga personal na biyahe sa ibang nasyon, asin paggastos para sa staff asin seguridad katakod kan mga ini.
Kaibahan man sa mga tinukoy na isyu an pagresebir soboot ni Duterte sa posisyon komo sekretaryo kan Department of Education sa ibong kan soboot kakulangan sa eksperyensiya, pati na man an mga alegasyon kan fake student vouchers, mapanos na pagkakang naiheras sa pirang eskwelahan, asin mga school materials na dae naideliver.
Pigdugang pa ni Castro an pahayag soboot ni Duterte na igwa ining aram na paagi tanganing mapababa an presyo kan bagas alagad dae kaini ini ipigheras huli ta habo kaining tabangan an Presidente.
