NAGA CITY- Nagpapadagos an pagtaong ayuda kan pamayuhan kan Barangay Mabolo sa siyudad nin Naga sa mga naapektaran na pamilya sa panlalamasa ni Bagyong Kristine.
Sa entrevista kan Bombo Radyo Naga ki Arthur Matos, Barangay Kapitan kan Barangay Mabolo, Naga City, sinaysay kaini na makalihis an Typhoon Kristine, nagpakol sa poco mas o menos 300 na pamilya an naapektaran kun saen kan nakalihis pa sana na semana nakapuruli an mga ini gikan sa mga evacuation centers.
Sigun ki Matos, nagkukundusir soboot an saindang mga personahe nin house to house tanganing mayong malampasan sa pagdedestrebwer nin ayuda sa mga naapektaran.
Kasabay man kaini an padagos na pagrilinig sa kapalibutan orog na sa mga areas na labing nadanyaran asin igwa pang nakatambak na dalnak o mga basura.
Dugang pa kan opisyal, padagos man an pagtatao nin tabang kan mga NGOs sa mga nangangaipuhan siring kan bulong asin iba pa na kaipuhan na maray sa presente.
Mientrastanto, para man sa mga narautan nin harong padagos an paglilibot kan mga barangay tanod kaibahan an iba pang personahe kan Barangay tangani na mailista kun siisay an makakareseber nin tabang.
Sa ngunyan, hagad liwat kaini an kooperasyon kan kada saro tanganing tolos na makabuhat gikan sa panlalamasa kan nasambitan ng bagyo.
