NAGA CITY- Pigheras kan pamayuhan kan Boy Scouts Bicol an importanteng role na saindang piggagampanan sa komunidad.
Sa entrevista kan Bombo Radyo Naga ki Enrique Besenio, Youth Development Officer III kan Boy Scouts Bicol Regional Coordination Office, sinaysay kaini na pigkriar sa irarom kan batas o RA 7278 an Boy Scouts of the Philippines o Commonwealth Act No. 111.
Sigun ki Besenio, obheto kan nasambitan ng ley na matawan nin opurtunidad an mga kaakian na magtalubo holistically kabali na digde an physically, spiritualyy, socially asin mentally.
Apwera digde, pigtatabangan man kan saindang lado an mga estudyante na magin sarong responsableng indibidwal sa komunidad sa paagi kan character building asin pagpapaintindi sa sainda kan saindang mga responsabilidad komo Pilipino.
Katakod digde, saro sana soboot an requirements na saindang pighahagad sa mga estudyante sa paglaog komo Boy Scouts, ini an pagkakaigwa nin willingness o kamawotan na pagbali.
Paliwanag kan opisyal na enkaso dae udok sa boot kan sarong indibidwal an pagbali digde, dae man soboot magigin marhay an resulta asin dae maisasabuhay an adal na saindang pigtutukdo sa mga ini.
Dugang pa ni Besenio, pigtutukduan kan saindang lado an mga kaakian sa mga gibuhon sa harong siringman sa laog kan eskwelahan na dakulang bagay para sa paghubog nin personalidad kan sarong tawo.
Sa ngunyan, hagad na sana kaini na mas kadakol pang jovenes an ma-enkaminar na maglaog komo Boy Scouts tanganing mas magtalubo pa an mga ini komo sarong indibidwal.
