NAGA CITY- Padagos an pagbabantay asin monitoring na ginigibo kan pamayuhan kan Barangay Balogo, Pasacao Camarines Sur sa bagyong Ramil.
Sa entrevista kan Bombo Radyo Naga ki Arnel Ama, Barangay Kagawad kan nasambitan ng lugar, sinaysay kaini na kasuudma pa sana pig-alarma na ninda an saindang mga residentes dapit sa magigin epekto kan nasambitan ng raot nin panahon.
Katakod digde, enot na pig-ibakwar an Badjao Community huli ta sinda an harani sa dagat. Mapakol sa nasa 80 pamilya an nagbibilog sa Badjao Community alagad tolos man soboot an mga ining nagsusunod sa mga abiso.
Apwera digde, ipinagbawal man an paglalawod partikular sa mga sararadit na parasisira kun saen isinabay naman an pagbugtak sa saindang mga bangka sa salbadong lugar.
Dae man soboot makusog an uran sa saindang area alagad padagos na pig-eenkaminar an gabos na kusang mag-ibakwar oras na kaipuhanon.
Sigun sa opisyal, kadakol man na lugar an designated komo evacuation center sa saindang area siring na sana kan day care center, mga eskwelahan, Barangay hall asin iba pa.
Sa ngunyan, pakiulay na sana ni Ama sa saindang mga nasasakupan na enoton an kasalbaduhan sa panahon kan kalamidad.
