NAGA CITY- Piglinaw kan pamayuhan kan CEPPIO-Naga na gabos na tabang na itinao o ipinaabot sa mga naapektaran kan mga nakalihis na mga bagyo an tolos na ibinaba sa mga nangangaipuhan na mga residentes.
Sa entrevista kan Bombo Radyo Naga ki Allen Reondanga, pamayo kan CEPPIO-Naga, sinaysay kaini na an mga ayuda o tabang na gikan sa DSWD, ki Presidente Marcos Jr, sa mga Senador, simbahan asin iba pa an tolos na pigdestrebwer sa mga nangangaipuhan.
Alagad kasabay man kaini, piglinaw kan opisyal na igwang pig-aapod na stock pile o mga naka-standy na relief pack na gagamiton sa panahon kan kalamidad. Sigun ki Reondanga, kaipuhan na igwang naka-standy na relief pack tanganing magamit o igwang mapaghuhugutan nin ayuda para sa pagresponde kan pagkakan kan mga tawo na nag-ibakwar tuyong igwang kalamidad.
Katakod digde, kan nakalihis na Bagyong Pepito, dae soboot nagtao nin relief packs asin hot meals sana an pig-serve nin huli ta mayo man nangyaring damage asin nakisirong sana man an mga nag-ibakwar sa mga evacuation center.
Pigtawan duon pa ni Reondanga na kaipuhan i-save an stock pile nin huli ta an NFA mayo ng stock kan bagas huli sa sunod-sunod na pagtama kan mga bagyo na kun saen an mga nakatagam na bagas kan nasambitan ng ahensiya an naipadara na sa mga nangangaipuhan na areas na nilamasa kan bagyong nag-agi.
Sa ngunyan, pigsierto na sana kan opisyal na bastante pa man an stock pile kan mga relief pack sa siyudad enkaso igwa na naman na maglaog na raot pa kan panahon.
