NAGA CITY – Pigheras kan pamayuhan kan Concepcion Grande, Naga City an mga trayumpo kan barangay asin an mga kaplanuhan ngunyan na 2026. Sa entrevista kan Bombo Radyo Naga ki Jerold Rito, Kapitan kan nasambitan ng barangay, sinaysay kaini na maski kan nakalihis na mga taon nakakabali na man an saindang barangay sa nagkapirang mga awards asin saro sa mga 27 barangay na pig-oomaw.
Dugang pa kaini na naresebir man ninda an award para sa programa kan nutrisyon na iyong igwang pinakamaray sa siyudad pag-abot sa nutrition committee.
Siring man, an Barangay Concepcion Grande soboot an nagin model barangay kan Naga City pag-abot man sa children programs.
Sigun pa ki Rito na sa presente, padikit-dikit man nindang pigpapakarhay an gabos na mga programa na naka-sentro bako sana sa sarong bagay kundi magin sa gabos na sektor kan saindang lugar an sainda man na pigtututokan.
Mientrastanto, pigtawan-duon pa kan opisyal na ngunyan na taong-2026 sainda man ipapadagos an napuonan na magagayon na proyekto asin programa kan saindang barangay asin kaplanuhan pa kaini na pauswagon an kinakaipuhan na pauswagon sa ibang sektor tanganing masierto soboot na maitatao an tamang serbisyo sa sainda man na nasasakupan.
Pagsierto pa kaini na saindang ipapadagos an konsultasyon sa mga private home owners, sa mga manlaen-laen na organisasyon tanganing masierto na an saindang piggigibo an basado sa pangangaipuhan kan mga residentes asin bakong basado sana sa kamawotan kan barangay council.
Kamwotan pa ni Rito na mamantinir an peace and order kan saindang lugar, siring man madugangan an mga CCTV camera asin street lights na siertong makakatabang sa pagprotehir asin kasalbaduhan kan mga namamanwaan sa saindang barangay.
