NAGA CITY- Pig-enkaminar kan pamayuhan kan DepEd-Bicol an mga Campus Journalist na magin totoo sa saindang mga pigsusurat.
Sa nagin patara-tara ni Dr. Gilbert Sadsad, Regional Director kan DepEd-Bicol, sinaysay kaini na an mga estudyante an kaipuhan irespeto an lambang tawo, pirmeng enoton kun ano an tama asin totoo mantang nagsusurat kan mga bareta impormasyon na idedesimanar sa gabos.
Sigun ki Sadsad, importante na tatao an mga campus journalist na pahalagahan o i-value an saidang sinusurat tanganing dae magin source kan pekeng impormasyon na sa presenteng panahon an talamak naman asin padagos na nagkukuriyat.
Dugang pa kan opisyal, dakulaon an responsabilidad na naka-atang sa mga estudyante tanganing proteheran an tamang pagbabareta na susog sa kun ano an totoo asin pinapatotoohan kan mga katibayan na nakapalaog digde.
Kasabay kaini, pig-enkaminar man kan opisyal an mga campus journalist na gamiton an pagsusurat sa pagproteher sa kapalibutan orog na ta kadakol nang pagbabago an naeeksperyensiyahan sa presente na kaipuhan an tolos na aksyon kan gabos.
Sa paaagi kaya kan pagsurat, natatawan nin mas hararom na pagkasabot an publiko sa saindang mga dapat gibuhon sa pagproteher kan kapalibutan.
