NAGA CITY – Pigheras kan pamayuhan kan Barangay Igualidad, Naga City an saindang mga kaplanuhan sa manlaen-laen na sektor.
Sa entrevista kan Bombo Radyo Naga ki Angelo, Romano Bendiola, Barangay Kpitan kan nasambitan ng barangay, sinaysay kaini na kan nakalihis na taong-2025 an saiyang ika-duwang taon sa saiyang enot na termino komo sarong Kapitan kun saen nadipisilan ini huli man sa duwang sunudan na makusog na bagyo an nagtama sa siyudad, asin digde man kaini narealisar na garo pighihiling kun hasta saen an saiyang kapasidad komo sarong barangay opisyal.
Dugang pa ni Bendiola na bakong pasil na magmanehar nin mga personahe asin mga empleyado orog na kun pararehas man apektado sa sarong bagay asin sitwasyon.
Alagad sa ibong kaini, maogma soboot an opisyal huli man ta kan nakalihis na taon, dakol an saindang nahaman asin sainda pang ipapadagos ngunyan na taong-2026.
Pigheras pa kan Kapitan na ngunyan na semana, pupuonan na an renovation kan saindang barangay hall kun saen igwa ining budget na P3 million.
Hurot pa kaini na kaipuhan na mapakarhay an nasambitan ng pasilidad huli man ta ini an nagsisirbing harong kan mga nagsisirbi, asin harong kan mga nangangaipo.
Sigun pa ki Bendiola na an proyektong ini an saiyang enot na hinanapan nin pondo puon kan saiyang pagtukaw sa posisyon.
Apwera pa digde, plano pa kan pamayuhan kan Barangay Igualidad na makabakal nin sadiring lunadan kan barangay tanganing igwa soboot magagamit enkaso man kaipuhanon kan saiyang nasasakupan asin kun igwang emerhensiya.
Mantang sa lado man kan edukasyon na apwera sa pagigin barangay opisyal, si Bendiola saro man na professional teacher kun saen kamawotan kaini na mapakusog pa an engagement kan school based pasiring sa community based.
Nagbababa man nin mga programa an Barangay Igualidad huli man ta nagtutubod si Bendiola na an saro sa mga kaipuhan kan eskwelahan iyo an tabang gikan sa barangay.
Pigsierto man kan opisyal na maski sa ibang sektor, saindang papapusogon an manlaen-laen na programa na siertong mapapakinabangan kan mga residentes sa saindang barangay.
Sa ngunyan pag-enkaminar na sana kan opisyal sa gabos na mga taga Igualidad na makisumaro sa mga aktibidad katakod kan papaabuton na 64th Foundation Anniversay kan saindang barangay.
