LIBMANAN – Aminado an pamayuhan kan Libmanan Public Market na dae organisado an mga section kan mga paratienda huli sa kalumaan kan merkado.
Sa entrevista kan Bombo Radyo Naga ki Anton Palo Market Administrator kan Libmanan Public Market, sinaysay kaini na nakakaapektar an pagigin luma kan saindang public market pag-abot sa usapin kan pagigin organisado.
Sigun sa opisyal, dipisil soboot na magmantinir kan nasambitan ng lugar huli man sa estado kan edificio.
Alagad sa ibong kan problema na ini, padagos man an bulos kan mga costumer.
Huli digde, pinapakiulayan kan pamayuhan kan Libmanan Public Market an mga paratienda na imantinir an kalinigan maski mayong proper sectioning orog na sa manok o karne.
Ini tanganing malikayan an mas orog pang dakulang huma na pwedeng kahampangon kan saindang lado.
Sa presente, kaibahan sa pigmamantinir kan mga opisyal an security asin maintenance kan market tanganing mayo soboot aberyang mangyari.
