NAGA CITY- Pigsierto kan pamayuhan kan Libmanan Public Market na mayo nin kontaminasyon asin ASF an mga orig na pigbubuno sa Slaughterhouse kan merkado orog na ngunyan na Bagong Taon.
Sa entrevista kan Bombo Radyo Naga ki Anton Palo (Market Administrator, Libmanan Public Market), sinaysay kaini na antes pa an Holiday Rush nagkaigwa na sinda nin meeting kaiba an mga parabuno sa merkado publiko kan Libmanan.
Digde pinag-ulayan an schedule kan saindang pagbubuno asin an pagrefresh manungod sa urulay hygiene asin sanitation huli ta pinakaimportante ini sa gabos.
Pigpopokusan kaya ninda na dae magkaigwa nin ano man na helang an mga tawo na nagkokonsumo kan produkto gikan sa slatter house.
Sigun ki Palo, marhay man dawa papano an pagmanehar kan mga nagpapabuno sa lugar, may minsan man na dae nagsusurunod sa saindang panundon alagad pirme man sindang igwa nin corrective measure.
Kadalasan, nagpupuon an pagbubuno nin alas dos nin imaaga hasta alas sais nin pagkabanggi, alagad ngunyan na igwang kasiributan, mas pig-aamayan pa ninda huli sa dakol kan mga konsumidores.
Pigtawan duon pa kan opisyal na regular na sindang nagkakaigwa nin meeting para sa tamang pag handle kan mga karne kan mga parabuno, tangani mas masiguro pa an salbado asin malinig na produktong orig.
An mga inpector igwa nin pig aapply na post mortem asin Antemortem, na kun saen bago bunuon, pigdo-double check an klase kan orig kung salbadong bunuon, pagkatapos kaini, saka naman ichecheck an laog na mismo kan lawas, kun an sarong organ may deperensya, dae na pigtutugutan pang ipadagos an pagbuno o itinda pa.
Sa ngunyan, nagpapakol na sa 320 per kilo asin 270-290 pesos an presyuhan kan karneng orig depende kung sa laog o sa luwas kan market.
