NAGA CITY – Pigkondenar ni Presidente Ferdinand Marcos Jr. an pambabadil ki dating US president Donald Trump sa sarong political rally sa Pennsylvania kan Sabado.
Sa sarong pahayag sa X (dating Twitter), sinaysay kan presidente na dakulang kaginhawaan na salbado asin nasa marhay na kamogtakan an dating presidente makalihis ining porbaran na i-assasinate.
Katakod kaini, nakikisumaro soboot si Presidente Marcos sa pagkondenar sa maski anung klase kan political violence.
Enot nang pigkondenar kan iba pang world leaders an nangyaring pambabadil ki Trump na ikinagadan kan sarong nag-atendir sa rally, asin ikinalugad kan iba pa.
Sigun man sa campaign team ni Trump, marhay na an kamogtakan kan dating presidente na nadaplisan nin bala an tuong talinga.
Napag-araman na nangyari an pambabadil, apat na bulan antes an November 5 election, kun saen liwat kaining makakahampang si democratic President Joe Biden.
